政情：阿王堅持用致癌「餐肉」比喻
立法會議員王國興（阿王）曾以午餐肉作例子，批評泛民主派「拉布」一日就等於嘥咗十幾萬罐午餐肉或豆豉鯪魚。不過，世衞早前將加工肉類列為第一類致癌食品，阿王繼續用午餐肉會否唔係太合適呢？阿王就斬釘截鐵話，唔會減少用午餐肉做例子，因為食物銀行主要以午餐肉、豆豉鯪魚、番茄豆等罐頭食物去支援基層家庭，所以當時「拉布」先會用午餐肉做比喻。
話問題視乎食量
不過，阿王透露，佢怕肥所以一向少食午餐肉，但相信午餐肉致癌問題好視乎食量。佢亦承認午餐肉面世之後，廣受港人歡迎，因為煎完之後的確好香。佢仲列晒茶餐廳常見嘅午餐肉食品添，果然理解港人飲食文化。不過，唔知佢會否為基層健康着想，推動食物銀行使用另類食物呢？其實阿王諗到用午餐肉及豆豉鯪魚來取代抽象嘅公帑數字，等市民易啲理解，算係有頭腦喇！