政情：財爺食米唔知洗碗價
自從實施最低工資後，工時長、體力勞動嘅行業都較難請人，其中飲食業更成為重災區，業界面臨人手長期不足問題。財政司司長曾俊華（鬍鬚曾）曾經講過，現時市區核心地段嘅洗碗工月薪一萬二千元，但都唔代表有人肯做。香港餐飲聯業協會會長黃家和就認為鬍鬚曾嘅講法太保守，因為現時業界出到一萬五千元都好難請人，暗寸鬍鬚曾同現實脫節、「食米唔知價」！
黃家和出街食少洗碗筷
黃家和尋日出席一個經濟研討會時表示，實施最低工資以來，業界單係人工開支已經大增，首年增加百分之十三，次年增加百分之八，估計今年亦會增加大約百分之七點五。雖然人工持續上升，但香港飲食界嘅吸引力反而大不如前，隨着上海、廣州、深圳等鄰近城市嘅硬件已超越香港，香港失去「美食之都」呢個美譽；加上受到最低工資影響，食客嘅消費隨之上升，相比之下吸引力自然減低。
黃又話，香港人近十年飲食習慣亦有改變，例如用餐前會先洗碗筷，又多咗用公筷及公匙，有外國朋友見到呢個情況覺得好得意。不過，佢指自己近三年來出外用餐都唔會特別洗碗筷，因為對業界嘅經營有信心，而且多年來佢嘅健康未有因此而受影響。
小巴業倡放寬司機限制
其實不單止飲食界難請人，交通界亦面對同樣困境。「新小巴大王」、公共專線小型巴士聯合總商會會長馬僑生話，小巴業界最少缺兩成多司機，即十架小巴欠兩名司機。除人手短缺，老年化亦係另一難題，現時小巴司機平均超過六十歲，佢建議當局放寬限制，簡化考牌及牌照互換制度，容許以單程證來港嘅內地新移民做司機，相信有助紓緩司機不足問題。
另外，旅遊業議會主席胡兆英會喺十二月卸任，但仍力銷本港旅遊業，佢話香港本身都有好多旅遊景點，足夠旅客玩足三日兩夜。不過，佢認為若要推廣本地旅遊業，港人都要對景點熟悉，先可以推介畀外國旅客。