佔中發起人、香港大學法律學系副教授戴耀廷尋日出席咗一場大學講座，主講「行公義的社會及哲學反省」，除咗解釋行公義，仲分享喺佔中後嘅反思。
佢承認，行公義時係會受到關注、掌聲、影響力及權力誘惑，因而「飄飄然」，仲形容啲誘惑係好似電影《魔戒》入面嘅戒指一樣。究竟佢係想行公義吖，定係因為各種誘惑而搞佔中呢？不過，佢最後都承認，公民抗命就係「博同情」。
戴耀廷話，以前做訪問，都冇佔中時期咁多人留意，仲話由前年開始，即佔領行動計劃嘅最初期，被傳媒關注時會有「飄飄然」嘅感覺。佢解釋係因為突然間成為咗焦點，同埋冇人會想一世都寂寂無聞，希望有一日都會被人關注。
之後戴耀廷話，群眾掌聲係會主導咗一切，佢喺佔領時期一走上「大台」，情緒會因為台下嘅反應而高漲，就連自己都控制唔到。佢仲形容，「大台」就好似電影《魔戒》隻戒指一樣。莫非佢暗示自己搞佔中搞到成「魔」？
卓妮