中環出更：揚「帆」出海順風順水
改名除咗講意境，仲要好意頭。卓妮日前喺健康快車慈善跑步行記者會見到副主席黃(巾凢)風，講起佢個名中間個(巾凢)字，其實最初媽媽幫佢改名時係用「帆」，但後來佢覺得既然寓意「一帆風順」，就要先「揚帆出海」，而個(巾凢)字上面嗰一撇，就正正好似個帆升起時嘅樣子，比起「帆」更加有氣勢，所以後來就改用(巾凢)字。
雖然改名手續多又繁複，要將證件啲名全部轉晒，但黃(巾凢)風話，生意上的確順利咗好多。此外，有次佢探訪老人院，有個長者根據佢個名即席揮毫，寫咗「黃(巾凢)風順」四個字畀佢做賀年揮春，令佢覺得相當窩心同好有意思。至於佢個三個月大嘅乖孫，佢就話唔會幫手改名，畀個機會阿女同女婿話事喎。
傷膝小吉唔跑得
健康快車下月二十八日會舉辦慈善跑步行，一眾籌委會成員都出席記者會，創會主席兼籌委會主席方黃吉雯（小吉）亦有到場。不過小吉就話佢唔跑得，唔知係咪因為以前着得太多高跟鞋，而且每對都好高，不知不覺間令膝頭承受太大壓力而受損，有次佢想練跑馬拉松，結果練咗一日，第二日膝蓋就好痛，之後睇醫生先發現自己已經唔適合跑步。
同場仲有合辦機構清水灣鄉村俱樂部副主席王桂壎（阿Huen）及副總經理毛翔明。阿Huen以前係壁球好手，因此肩膀特別寬，但自從唔打壁球之後，過往特別結實嘅部位變咗肥肉。
阿Huen笑話現時影相幾乎冇人個膊頭會橫得過佢，而佢自從一○年後就好少跑馬拉松，但會提供場地及美食支持參加者。
卓妮