俗語話，兵來將擋，水來土掩，面對唔同情況採取唔同對策，先至可以解決問題。可惜港府偏偏相反，一味墨守成規，唔識靈活變通，一遇到危機就企喺度，唔係望天打卦，就係坐以待斃。好似假難民問題咁吖，人數愈來愈多，當局一直束手無策，卒之搞到七國咁亂。
唔係講笑o架，近年免遣返聲請個案持續增加，至今已積壓一萬零四百五十宗，本年度預計要花費六億四千四百萬元公帑處理，比上年度增加逾兩成。係人都知，超過九成九免遣返聲請者係假難民，納稅人年年被迫使咁多錢喺佢哋身上，簡直係冤哉枉也。小數怕長計，當局再唔盡快諗辦法亡羊補牢，呢個財政黑洞只會愈來愈大嘅咋。
正如有立法會議員質疑，有印度職業介紹所懷疑串同本港律師行，招攬印度籍人士來港提出聲請，然後留港非法工作。而保安局局長黎棟國亦承認，有假難民及偷運人蛇集團濫用酷刑聲請機制來港打黑工或從事其他不法活動。
既然係咁，當局又點樣對付呢？黎棟國聲稱將會研究推出一系列措施，防止聲請機制被濫用，包括從源頭堵截、改善免遣返程序、加快審核、提高偷渡及安排偷渡罪行嘅罰則等；仲會透過中國外交部同相關國家商討，或者直接派人往印度調查當地嘅「一條龍」來港酷刑聲請活動喎。
嗱，咪話功夫茶潑冷水，呢啲所謂嘅措施得個講字，有姿勢冇實際，根本止唔到咳。有人提議，要解決假難民問題，只有效法當年處理越南船民問題咁，重設禁閉營收容酷刑聲請人士，令佢哋無法出外打工，減低來港嘅誘因。
冇錯嘞，當年越南船民源源不絕而來，搞到香港幾乎陸沉，如果唔係採取禁閉措施，都唔知點收科。依家假難民話就話冇越南船民咁多啫，但如果港府繼續闊佬懶理，冇人敢擔保香港唔會再次成為難民港o架。不可不知，家陣嘅假難民來自唔同國家，除咗南亞裔及越南人，亦有唔少非洲人，長此落去，香港遲早變成聯合國都似。
講到越南船民，又勾起唔少港人嘅痛苦回憶。當年英國政府靠害，將香港列為「第一收容港」，前後收留超過二十萬船民，足足困擾咗廿幾年，依家聯合國仲拖欠香港十幾億元未歸還吖。正所謂，見過鬼怕黑，經過越南船民潮嘅教訓，港府照計應該堵塞法例漏洞，加強把關至係，點知一樣係中門大開，來者不拒，簡直匪夷所思。有人話港產官僚係牛皮燈籠，點極都唔明，真係一啲都冇講錯！