立法會財務委員會新任主席陳健波（波哥）剛上任時，多名泛民議員都盛讚佢主持會議持平，好過兩年前嘅吳亮星好多。其中社民連梁國雄（長毛）、人民力量陳偉業（大舊）等激進派議員，更示意可能會終止就創新及科技局撥款拉布，令撥款有機會喺今日嘅財委會會議上通過。不過當波哥揸正嚟做，將長毛及大舊等人提出嘅一千一百多項拉布式動議，「剪」剩得百多項後，拉布議員就立即「變臉」，揚言要同波哥「全面開戰」，並「偷步」喺尋日嘅立法會大會拉布。
尋日大會剩番一項已經講咗一半嘅「一帶一路」動議同一項食水安全動議，原本估計只需三、四個鐘，即大約中午時分就完會。
但由於幾位拉布議員不停要求響鐘點算法定人數，長毛臨尾更提出中止待續議案，最後拖拖拉拉搞到接近晚上八時先結束，估計佢哋會再喺今日嘅財委會玩嘢，創科局撥款最樂觀都要押後多一個星期先過到。
不過，同之前嗰幾次拉布戰唔同，今次只得幾位拉布議員搞事，其他泛民議員可能唔想失票而暫時未有跟隨，相信佢哋唔會玩得好耐，波哥都唔使太擔心。