俗語話，一處鄉村一處例，唔同地方有唔同習俗及規矩，如果唔識得入鄉隨俗，隨時撞板。就以揸車為例，香港同內地嘅道路規則唔同，交通法例亦唔同，有啲內地司機喺香港人生路不熟，加上駕駛態度有問題，想唔出事都幾難。好似尋日咁吖，有位內地富二代揸跑車喺落馬洲衝關，然後直踩市區，問你怕未。
唔係危言聳聽o架，隨着持內地駕駛執照免試簽發香港駕駛執照嘅個案逐年遞升，相關交通意外亦不斷增加。運輸署數字顯示，獲免試簽發香港車牌嘅申請個案，一二年係二萬二千幾宗，去年增至近三萬五千宗，而今年一至九月底就有二萬八千宗；至於相關交通意外，過去三年分別有六十六宗、八十七宗及八十六宗，短短三年升幅超過三成，都咪話唔得人驚。
點解會咁？答案好簡單，咪就係因為部分司機唔熟悉香港嘅道路及交通規例囉。本報記者隨機抽樣訪問五十名持內地駕駛執照獲免試簽發本港駕駛執照嘅司機，結果喺五條本港交通問題中，其中兩條八成人答中，另外兩條八成人答錯，而涉及醉酒駕駛呼氣要求嘅問題，所有人都答錯添。有位內地司機對本港有引擎空轉法例感到奇怪，亦有司機反問唔係車輛到達停車區就唔使熄引擎咩？好明顯，佢哋對本港交通規則一知半解，唔怪得交通意外急增喇。
有立法會議員就講得啱嘞，此類駕駛者唔熟悉本港情況，隨時可能發生意外，對其他道路使用者構成危險；而業界人士就建議運輸署要求申請人先接受路面訓練及理論課程，然後至簽發香港車牌。運輸署又點樣回應呢？佢哋話喎，申請人只要符合法例要求，就可透過持有外地正式駕駛執照獲發香港駕駛執照，毋須喺香港參加筆試及路試。一派官腔，講咗等於冇講。
所以話，官僚就係官僚，一味墨守成規，唔識與時並進。香港道路狹窄，人多車多，交通本來已非常繁忙，加上申請免試簽發香港車牌嘅內地司機愈來愈多，佢哋一來唔熟悉環境，二來唔熟悉法例，結果咪頻頻出事囉。仲有吖，一旦內地司機喺香港違反交通條例或涉及交通意外，警方檢控都有困難喇，隨時出現走數都似。
講開又講，前朝政府好大喜功，多年前推出粵港自駕遊計劃，港車可以北上，內地車亦可以南下，後來由於爭議太大，內地車南下嘅計劃被叫停，先至平息風波咋。係人都知，近年中港矛盾不斷惡化，搞到嘈喧巴閉，永無寧日，當局再唔盡快檢討免試簽發車牌嘅政策，隨時爆大鑊o架。