世界衞生組織失驚無神公布：加工肉如腸仔、餐肉、火腿等，跟吸煙、飲酒及食砒霜無乜分別，被列為風險最高的一級致癌物。同時，世衞把豬牛羊等新鮮紅肉列為危害較高的２Ａ級致癌物，認為呢兩類食物會增加罹患腸癌及胰臟癌等癌症的風險。
老朽雖然活了一把年紀，之不過，睇過世衞咁驚嚇嘅風險評級報告，當堂個心好似阿姐咁離一離！唔係，係個心當堂跳咗出嚟！阿哥，早講啊！老朽自幼家貧，食午餐肉、腸仔食咗大半個世紀，依家你先至提出警告？
老朽睇吓個廚櫃同雪櫃，仲有成十幾罐各類牌子嘅午餐肉，幾十包各類腸仔，仲有幾斤鴨膶腸添，依家是否全部要掃落垃圾袋？
講真，腸仔、煙肉、午餐肉、火腿，都係老朽嘅童年、青少年食品。老朽自幼孤苦，一個人長大，自己照顧自己，試問有乜方便過煎兩隻蛋及兩塊午餐肉，淋些老抽，咁又一餐啊。有時懶起來，成罐午餐肉夾麵包又一餐。如果呢啲加工肉咁鬼毒，能活到這把年紀，都算上天厚我矣！
事實上，茶餐廳嘅早餐，亦離唔開餐蛋、腸蛋、煙肉同沙嗲牛肉麵，即使去快餐連鎖店，食嘅亦離唔開漢堡扒，一樣係加工肉。咁搞法，豈不是大多數港人返工前無不在食砒霜？香港人睇嚟想唔短命都唔得。
國際癌症研究所又稱，只有一款用來製造瑜伽褲的化學物質獲標籤為不會致癌，意味大家只能上瑜伽課，但期間最好不要呼吸，因為根據研究所嘅清單，連呼吸空氣也可能致癌。
老朽呢類食肉獸，早知地球咁危險，一早遁入空門，改法號「慧施」，信佛就唔食咁多嘢！「去年五月黃梅雨，曾典袈裟糴米歸。」清貧得來又冇牢騷，唔使驚幾時死，不亦樂乎！