中環出更：怪醫自爆揸車瞌睡勁牙煙
藥駕、毒駕以及酒後駕駛後果嚴重，但市民都唔好忽視疲勞駕駛。立法會醫學界議員梁家騮（怪醫）就試過攰到揸車時瞓着覺，差啲釀成意外！怪醫透露，曾經喺威爾斯親王醫院通宵輪更後再直踩日更，直到黃昏先收工揸車離開。當佢駛出隧道時突然「扎」醒，個心仲嚇到噗噗跳，因為佢喺隧道內瞓着咗，當時架車仲喺兩條行車線中間，險生意外。
醫生睡眠不足易釀事故
怪醫最近委託中文大學醫學院精神科榮潤國教授，就超時工作同通宵候召做調查。調查訪問五百九十九名公立醫院醫生，發現普遍受訪者睡眠不足，超過一成每周工作逾六十五小時嘅醫生，試過做手術期間瞌着覺，調查仲發現，近四成每周工作逾六十五小時嘅醫生曾出現醫療失誤或意外，比每周只工作五十小時嘅醫生高出約一成半，反映工時過長影響醫生表現。
梁家騮就建議設立標準工時，引入超時補水去畀誘因管理層，按工作流程去改善制度。醫管局就話，每周工作逾六十五小時嘅醫生比例已減至不足半成，未來會繼續增聘人手同改善工作條件。不過，無論相關措施落實與否，工時長都唔係疲勞駕駛嘅藉口，否則係罔顧市民安全。
卓妮