中環出更：水墨情懷 學府「爭」添文化氣息
中國水墨畫源遠流長，難得嶺藝會早前在香港大會堂舉辦「水墨情懷雙城展」，展出過百幅來自港台兩地嘅水墨作品，卓妮當然把握機會，欣賞呢種傳統藝術啦！理工大學校長唐偉章在場細心聆聽介紹，莫非佢係大師級？點知佢只係初哥一名，學習緊點樣欣賞水墨畫喎！佢透露，除咗兒時學過、到羅浮宮望過名畫外，都無乜接觸過繪畫。
唐偉章又話，雖然理大一向偏重理工科目，但已經成立咗文化推廣委員會，每年都引入文化藝術節目。去年更邀請到嶺藝會會長、嶺南畫派大師趙少昂的女入室弟子趙伍月柳擔任駐校藝術家，教授師生水墨畫，更於校內開設畫展添！
趙伍月柳同中大淵源深
見到理大努力注入文化元素，中文大學副校長霍泰輝指中大亦無落後，皆因中大同趙太有更深厚淵源！霍泰輝透露，趙太兒子、趙偉仁係中大外科教授，又對水墨畫有認識，所以中大校園內掛咗唔少佢哋母子嘅作品。
卓妮見霍泰輝唔係得把口，寫毛筆甚有功架，但佢話從無學過寫大字，只係靠讀書時寫毛筆同練習簿操番嚟。佢仲大嘆現今學生依賴電腦，加上學校又少訓練，學生變得唔識寫字，佢仲激動話應該要培育下一代中國文化藝術，例如要背範文。
民政事務局副局長許曉暉同樣寫得一手好字，佢都認同要復興毛筆字，因為字等於人嘅衣冠。此外，佢對攝影同陶瓷都好有興趣，更會以素描當禮物。不過，唔好以為多興趣就會一屋都係作品，佢竟然連為大女畫嘅素描都無留起，皆因佢話囡囡成長、樣貌會改變，仲相信自己下一幅作品會更好喎，認真有信心喎。
卓妮