近年本港基建工程唔係延誤，就係超支，當中有好多原因，包括港府無能、承建商失誤、社會及政治阻力等等。其實，除咗呢啲因素，仲有一個原因，就係建造業人手青黃不接。
呢，近年唔少大型基建工程陸續動工，但好多工種出現人手荒，特別係起重機、天秤、掘泥推土機等重型機械嚴重缺乏人手尤其欠缺年輕新血。點解會咁？咪因為培訓階梯不足囉。本報記者踢爆，建造業議會嘅重型機械操作課程嚴重供不應求，最近部分課程已經停止招生；就算有報讀者通過面試，亦要輪候二至五年至可以上課，搞到好多學生望門興嘆，最終被迫放棄入行。
你話港府係咪低能吖，一邊大呻建造業人手不足，大灑金錢賣廣告叫年輕人加盟，一邊課程僧多粥少，將有志投身者摒諸門外，簡直係自相矛盾。報讀重型機械操作課程啫，又唔係報讀穿梭機操作課程，居然要等五年至有得入學，唔止係笑話，簡直係天方夜譚，咁同逼人放棄入行有乜分別吖？唔怪得建造業青黃不接嘞！
咪以為呢啲係小事吖，隨時阻礙香港發展。外國行業人手唔夠，可以輸入外勞，好似新加坡咁，引進百萬外援生力軍，可惜港府弱勢無能，輸入外勞成為政治禁忌，想學新加坡都唔得喇。唔係講笑，隨着政府大興土木闢地建屋，本港即將進入基建高峰期，特別係前特首曾蔭權爵士好大喜功，多項大型基建工程同期上馬，除咗扯高建築成本，仲搞到建造業人手短缺，如果再無足夠新血加盟，工程隨時爛尾都似，點止延誤超支咁簡單吖！
正所謂，一榮俱榮，一損俱損。社會及經濟發展需要大型基建支撐，而大型基建又需要工人興建，如果建造業再冇新血補充，乜都唔郁得喇。難怪有人慨嘆，回歸後基建工程不斷增加，唯一冇增加嘅就係建造業工人，今日喺地盤開工嘅工友，幾乎清一色係回歸前「玫瑰園計劃」嘅班底，十年之後當呢班工友陸續退休，香港隨時陷入停擺，一齊步入日薄西山嘅暮年都似。
講嚟講去，都係港府無能之過。老實講，建造業人手緊張，已經唔係一朝一夕嘅事情，當局如果真係「適度有為」，及早增加培訓名額，又點會搞到今日咁嘅局面吖。咪話功夫茶唔提醒，隨着本港人口老化加劇，建造業人手荒只會愈來愈嚴重，港府繼續等運到，唔通真係大安旨意？
當然喇，天生我材必有用，年輕人最緊要自己爭氣，雖然重型機械操作課程唔易報讀，但行內其他工種仍然需要各種人才，正如廣告話齋，「建造業需要你」，為香港發展出一分力，總好過日日匿喺屋企做宅男吖。