政情：八網難逃：吳克儉借「橋」發揮
外號「吳得掂」嘅教育局局長吳克儉，近日效法特首梁振英開設個人facebook專頁，並喺尋日下午上載咗數張自己探訪大欖涌海事訓練學院時拍攝嘅相片。佢留言讚揚學員態度積極認真，又有好高嘅安全意識，於進行模擬駕駛，「開船」駛過日前剛發生意外嘅汲水門時，學員會特別小心，「一定不會撞橋！」不知因為汲水門大橋事件而備受批評嘅運輸及房屋局局長張炳良，見到吳得掂嘅幽默留言時仲識唔識笑呢？
五議員急抽水（火羅）爆
吳得掂「抽水」變踩人，五名爭相借撞橋意外「抽水」嘅立法會議員，就冇佢咁好彩嘞。話說撞橋意外發生後，有五名議員先後入紙申請喺今日舉行嘅立法會大會上，就撞橋事故「打尖」提出緊急口頭質詢。不過，立法會主席曾鈺成尋日裁決，指有關質詢冇急切性，唔會因為無法喺今日嘅大會提出，就產生重大嘅不良後果，暗批五名議員抽水抽得太急切。