政情：財會新一「波」剪布

倘逐條表決 恐拖到聖誕

陳健波表示，秘書處已經收到議員就創科局撥款申請提出嘅一千一百三十三條臨時動議，其中提出最多動議嘅係獨立議員黃毓民，共有七百條；社民連梁國雄就提出二百四十七條；人民力量議員陳偉業及陳志全就分別提出一百條及約七十條；議員張超雄及梁家傑亦各自提出八條及一條。陳健波稱，處理一條臨時動議大約要一分半鐘時間，處理千多條臨時動議就要廿八個小時，如果財委會每周開兩節、即四小時會議，估計需要拖到聖誕節先可以進行表決。

不過，陳健波講明唔希望拖到聖誕節，認為市民都唔想睇到，仲話臨時動議都係畀議員表達意見、記錄在案，與其花廿八個小時不斷撳掣否決臨時動議，不如將時間用來討論議案。所以佢會喺呢兩日裁決議員提出嘅臨時動議是否與撥款申請有直接關係，而秘書處已經見到有不少臨時動議係重複同序列式，根據過往先例，呢一類已經可以「剪」得。此外，佢亦會與幾位提出臨時動議嘅議員商討，研究能否把臨時動議整合，或者根據優先次序將數目減少。

陳：高鐵港珠澳橋更難搞

陳健波又話，相信今次創科局撥款申請並非最難嘅事，相信高鐵超支撥款申請及港珠澳大橋嘅撥款申請將會更加困難，希望可以同議員建立互信，又強調財委會唔係搞政治爭議嘅地方。正所謂前車可鑑，金融界議員吳亮星做財委會主席時已於新界東北發展撥款申請一役被批評粗暴表決，若今次陳健波不妥善處理「剪布」決定，稍一不慎，就算只係一年嘅主席任期都會好難捱。