公眾場所女廁經常排長龍，政府終於的起心肝決定修改有關條例，將男女公廁比例由一比一提升至一比一點五。尋日立法會有關條例草案小組委員會就此進行討論，議員何秀蘭（Cyd）就覺得政府關於男女廁比例嘅新建議依然唔掂，仲叫男官員應該着晒成套女裝冬天衫如廁，咁先可以了解女性嘅需要。玩到易服咁大，與會嘅發展局副秘書長羅淦華就梗係冇睬佢啦！
Cyd批評政府對男女公廁比例嘅新建議係遠遠不足，質問羅淦華當局喺草擬法例、進行諮詢及顧問研究時究竟有幾多女人參與，又建議官員着晒成套女裝冬天衫試吓去廁所要幾耐時間︰「仲要着埋大褸、拎埋手袋，着埋襪褲諸如此類，裙呀，都唔叫你着bodysuit，你試吓搞晒成套，同你男人去拉條拉鏈時間差幾耐！」
Cyd又投訴葵青劇院女廁不足，但劇院一行有七十個座位，啲座位又窄過航空公司經濟客位，萬一中場休息去廁所返唔切埋位，就要「檻」過三十幾對大髀先行得番埋座位，覺得新建議比例套落文化設施場所嘅女廁係更加不足喎。如果Cyd返唔切座位，下次不妨可以揀近洗手間或走廊嘅座位吖。
卓妮