老人家教落，邊有咁大隻蛤乸隨街跳呀。冇錯，大隻蛤乸就話冇啫，但大大隻死貓，就多多有得食。
講緊嘅咪係鉛水事件囉。嗱，鉛水事件愈演愈烈，尋日又有中學嘅食水驗出中招，受害者愈來愈多，事件鬧足幾個月嘞，不過當局調查進度就老鼠拉龜，先後成立三個委員會調查，話就話要搵出問題源頭同埋解決辦法，到頭來又係雷大雨小。最離譜嘅係，調查食水含鉛量超標專責小組初步報告指出，「禍鉛」居然係水喉工人技術欠佳所致，你信唔信吖。
千錯萬錯，原來淨係工人嘅錯，當局擺明推卸責任，水喉匠被迫食咁大隻死貓，唔嬲就假咯。有工會出頭抱打不平，認為水喉工人以往接受培訓時，只係以唔漏水作為焊接喉管嘅合格標準，至於燒焊靚唔靚，亦同水質無關係。冇錯嘞，水喉工人唔係魔術師，如果焊料中冇鉛，根本冇可能無中生有，變出鉛水嚟。問題出喺焊料含鉛，一般水喉工人唔會買焊料開工，而每次工人取地盤材料施工亦有記錄，依家未查明是否工序「判上判」監管出事，反而入工人數，實在好唔公道囉。
話時話，鉛水風波搞到咁大鑊，冇可能係個別人同個別環節出問題，好明顯係一條龍式出錯啦。總承辦商及持牌水喉匠冇履行合約上有關監管及法律責任，固然係責無旁貸，而作為監管部門嘅房屋署，既冇檢查焊料品質，更冇為新落成公屋抽驗食水含鉛量，把關咁粗疏，監管咁失職，唔出事至奇。至弊係醜聞被踢爆後，當局仲一度想臭屎密冚，結果引起更大嘅憤怒。一句到尾，對於鉛水風波，官僚應負起最大嘅責任。
正所謂，錯就要認，打就企定，衰在港產官僚啱啱相反，錯就唔認，打就卸定。嗱，有辦你睇，無論係水務署專責小組抑或係房委會相關委員會發表嘅調查報告，都係高高舉起，輕輕放下，淨係提出多項補鑊措施，講到追究責任就隻字不提，問你服未。至於特首委任嘅調查委員會係咪追究責任，唔使問都知喇。嗱，連政務司司長林鄭月娥都忍唔住開腔，批評有人將鉛水事件政治化，仲講「官到無求膽自大」添，官官相護到咁嘅地步，直頭「官到無恥膽自大」呀。
即係咁，港府都識講喇，「民生無小事」吖嘛，食水安全關乎全港市民嘅健康，更加唔係小事。家陣香港已經夠晒亂，尤其係區議會選舉臨近，當局再唔快快趣趣擺平鉛災，盞成為政客抽水把柄，想唔政治化都幾難咯！