小五女生羅芍淇，二○一三年在基真小學校園墮斃事件，法官狠批作供嘅副校長、訓導主任及教師等人不誠實，試圖以謊話自圓其說，其中有個副校長作供時指墮樓女生口鼻流血「似在睡覺」；另一副校長指傷者「行得」可坐輪椅……
事件引起社會嘩然，為人師表者，不單止唔關心學生，竟然還在死者傷口灑鹽，呢啲係乜嘢教師嚟o架？人命關天，學校嘅「聲譽」比學生嘅生命更重要？呢件事引起社會對學校怕撥打「九九九」嘅關注。教育局為避免案件重演，本學年已更新《學校行政手冊》，列明學校應採取適當行動包括立即致電九九九要求緊急援助或代召喚救護車服務。
之不過，明文白紙黑字寫咗又如何？再有小六男生在校撞爆右眼，校方以男生右眼已止血及清醒為由不報警，小六男生碎片插眼，校方都可以對家長話「你個仔無乜嘢」！
根據報道，稍有常識嘅人，都知道要第一時間打九九九或急Call救護車啦！事件反映學校只顧及「校譽」多於一切，縱使更新《學校行政手冊》，有關學校高層、教職員依然熟視無睹！
有小學校長認為，學校在執行手冊時存在困難，仍需靠臨場判斷。依老朽看，這是關乎教師有否愛心，有否視學生如自己仔女般看待，以小六生撞爆眼，眼鏡破裂，血流披面為例，根本不需考慮，第一時間就要報警，校方不報警事後點解畫都係於理不合！
王瑤評魯迅是真正的知識分子。甚麼是知識分子？他首先要有知識；其次，他是「分子」，有獨立性。否則，分子不獨立，知識也會變質。香港有些教師，就是沒有「分子」，抱殘守缺，連常識也沒有，怎會不變質！