政情：八十後商界才俊搞智庫
「八十後」嘅年輕人，有人憂愁幾時可以置業上車，有人一早投身商界大展拳腳，其中商界出身嘅葉氏化工旗下紫荊花塗料集團工程副總監黃梓謙（Gary），最近加入智庫做理事，可以叫做半隻腳踩入政治圈子。
牛津畢業 百足咁多爪
早前成立嘅智庫「民主思路」尋日舉行記者會，公布一項有關中間派路向嘅調查結果同埋講吓未來大計，其中Gary首度現身亮相，據聞佢喺香港大學文學院畢業後，又讀咗倫敦大學法學士及牛津大學外交學碩士，算係高學歷嘅青年才俊。
Gary話，其實商界好多人參與政治，佢老細都知佢百足咁多爪，至於可以點樣幫手籌款，Gary就話依家先做好深度調查、專題出書及同行者計劃等，相信將來籌款就水到渠成喇！
講番個調查，總共訪問約一千人，四成二認為自己傾向中間派，六成八認為要有溫和中間力量，七成半支持中央同泛民對話。