政情：黨員撐卿姐留任防「搞事四人幫」干預

三議員被評「極惡劣榜樣」

三名白鴿黨員陳德明、楊錚同羅國強於本月中向黨中央同全體會員發信，首先力撐卿姐不搞拉幫結派，敢於拒絕未經黨內討論所謂白鴿黨同公民黨合併等事宜，表明於當前政治環境、民間導向等因素下，身為主席嘅卿姐不能退，不能謙讓。

信中又點名批評黃碧雲、胡志偉同涂謹申三名白鴿立法會議員，指佢哋公開支持不獲黨支持並退出白鴿黨嘅人士參選，質疑中委係咪通過三人有特權，形容呢個係極惡劣嘅榜樣。

盼能維護整體利益形象

除咗批評黨內自己人，陳德明等三人其後把矛頭直指「搞事四人幫」，開宗明義指「部分立法會議員、中常委、中委要考慮不宜和黎智英、陳日君、陳方安生搞得過熱」，並指「特別係唔希望佢哋插手民主黨內部決策和路向」，目的係維護白鴿黨整體利益同形象。

翻查資料顯示，陳德明等人過去多年曾多次向黨發表公開信批評「搞事四人幫」，叫佢哋唔好再指指點點，陳德明接受查詢時表示，計劃於年底黨員大會再作跟進。其實卿姐於政圈打滾多時，一直予人立場堅定嘅感覺，就睇今次點樣跟進及回應黨員訴求，而「搞事四人幫」若知醜都應該自己摺埋，咪再攪亂檔！