中環出更：劉展灝「多嘴」反標時遭投訴
標準工時委員會（標委會）前年成立至今運作兩年半，最遲明年三月要向政府遞交報告，但六名勞方標委會委員於討論嘅關鍵時刻考慮集體「跳船」，原因係不滿官方推動標準工時立法不力，據聞有工商界中人亦大吐苦水，呢個就係標委會資方代表之一、工業總會前會長劉展灝（Stanley），佢聽聞有勞方委員投訴自己，估計同自己喺標委會太多出聲等有關。
稱遇示威亦不會屈服
Stanley自言有人投訴都冇計，事關佢講到明代表商會唔贊成標時立法，唔可以因為有人投訴就唔講，佢強調，勞資雙方都可以喺標委會中講道理，又稱自己所講嘅數據都係根據官方報告，勞方都反駁唔到佢嘅理據。
不過，Stanley嘅標時立場如此鮮明都有代價，原來立法會議員梁國雄早前帶同十多人到其公司示威爭取標時立法，佢知悉事件後感到好嬲，重申自己都係為商會發聲，亦唔會對呢啲行為屈服，事後有就此報警備案。
話時話，標時傾咗已有一段時間，勞資雙方仍然企硬本身立場，最終有否突破性發展，就睇吓有無雙方都信任嘅有心人居中協調，甚至促成其事！
卓妮