中環出更：各展身手餐飲業逆境自強
零售市道不景，部分旺區店舖租金已開始下跌，尋日卓妮喺活動上見到米芝蓮食肆「阿鴻小吃」創辦人黎偉鴻，講起去年佢間北角店舖因為捱唔住貴租而結業，佢話現時租金似乎略有下調，假如請到人嘅話，唔排除北角店會捲土重來。
香港中華廠商聯合會將於本周六起喺葵涌運動場舉行「第四屆香港食品嘉年華」，期間每日會有唔同名廚及師傅一展手藝。尋日會長李秀恒（Eddy）率先拍住黎偉鴻即場示範煮南乳粗齋，副會長戴澤良就跟傳統拉糖師傅杜煥學整拉糖公仔。
拉糖師傅嘉年華一展技藝
講起市道問題，黎偉鴻話，好多舊客都由北角跟到現時觀塘嘅舖，但都預咗流失唔少街坊客。現時想喺北角開番店唔算難，但請人先係問題，因為依家後生師傅多數做西餐或日本餐，滷水師傅唔易搵，所以佢最近研究緊轉做咖喱等其他類型食肆。
至於做咗拉糖師傅六年嘅杜煥亦會於嘉年華大展身手。本身是設計師嘅佢，不忍呢門傳統手藝就咁消失，於是多番鑽研有關技巧，到時市民購物之餘亦有機會一睹呢種懷舊玩意。
講番個嘉年華，南北行聯營業務發展經理崔家權話，近兩個月公司營業額下跌一成，故會於活動推出一元養生湯包吸客。戴澤良預計，活動每日可吸引約二至三萬人進場，較上屆增約百分之五至十。對於近期內地訪港旅客數字下降，Eddy認為港元匯價相對高，故令購物天堂吸引力減少，望舉辦大型活動有助改善有關情況。
卓妮