政情：減肥妙法「少」食一半
莎莎國際主席郭少明尋日出席一個競步活動，見佢身形比之前清減咗，原來佢喺呢四年期間，足足減咗三十磅咁多。究竟郭少明有咩妙法？佢話個秘訣就係習慣將每餐嘅食量都減到以前嘅一半，例如以前食一塊牛扒，依家就只會食半塊。
郭少明講起減肥時就話，其實佢依家食嘢都冇刻意少油少鹽少糖，咩食物都照舊擺落肚，就算畀舊梅菜扣肉佢，佢都一樣照食，不過為咗減磅，佢食嘢時就會食少一半。咁剩低嗰一半食物點處置呢？郭少明就話：「畀老婆食囉」。郭少明又憶述，最初減肥時一開始瘦得好快，三個月就瘦十磅，但之後進度就慢咗落嚟，需要持之以恒。佢又話，試過買衫時專登叫店員畀細兩個碼自己，個店員仲以為佢開玩笑，其實係佢好了解自己貪靚嘅性格，買咗靚衫著唔落，就會逼自己減到著到為止喎。