食物及衞生局局長高永文二○○七年喺雲南出席一個步行籌款活動期間頭痛，返香港檢查後先發現原來係腦下垂體中有個良性腫瘤。高永文尋日喺電台節目中重提舊事，自爆當時前後食咗三粒類固醇，再自己同自己打針都無效，真係能醫不自醫，最終搞到要急急撲機票返港。佢又透露，雖然事隔八年，但原來至今都要每年檢查一次。
之前高永文落區宣傳政改，與市民發生爭執，佢嘅一句「講完」仲成為一時潮語。高永文尋日喺節目中講番起件事時就話，做過嘅事無謂再辯護或後悔喇，不過因為自己一直最介意畀人指摘佢呃人，仲要係呃細路，希望市民可以明白。
高永文又提到，人哋對於高永文呢個人最難忘嘅可能係沙士後，時任醫院管理局主席梁智鴻（金刀梁）辭職時佢流嘅眼淚。但佢自己最深刻嘅係醫管局前行政總裁何兆煒感染沙士入院時，佢同梁智鴻一齊寫電郵向同事公布消息、忍唔住相顧而泣嘅一幕喎。