政情：鍾國斌泳賽無復當年勇
曾被冠以「立法會飛魚」美譽嘅紡織及製衣界議員鍾國斌（Felix）今年甩底冇參加維港渡海泳，但尋日就參加咗一個慈善游泳比賽，可惜曾喺呢個比賽中奪冠嘅佢，今次就老貓燒鬚，三甲不入。Felix就話，因為呢排掛住開會，冇時間練水，只能夠喺比賽前兩日先至抽到時間練習，加上其他選手個個都後生佢一大截，所以都預咗唔夠人哋游喎。
自稱唔夠後生游
Felix前年都有參加呢個慈善游泳比賽嘅領袖邀請賽，兼且勇奪冠軍殊榮，但今年就三甲不入，似乎狀態一般。Felix話，因為其他對手太勁，而且個個都三十幾歲，好後生，所以都預咗唔夠人哋游，加上自從立法會十月復會之後，都好難抽時間練水︰「日日財委會開到七、八點，惟有比賽前兩日早啲起身抽時間練，所以今年狀態冇咁好。」
Felix就自言唔會太過介懷比賽成績。所謂一分耕耘一分收穫，Felix今次臨急抱佛腳，成績就算唔好相信都係佢意料中事喇。