政情：CY開fb 兩度「被消失」
港府高官除咗要有政治能量走入群眾，亦要學會用社交網站facebook（fb），甚至預咗畀網民惡搞或鬧爆，特首梁振英（CY）尋日喺fb用真名開帳戶，令人以為係唔怕畀人惡搞或批評，但套用網民嘅用語，原來CY嘅fb一早戴晒頭盔及着晒盔甲上身，目前只係停留喺可以讚好（like）同分享，朋友以外嘅網民想留言就欠奉，而CY嘅fb開咗半日，至少兩度「被消失」，即有關連結失效或頁面被移除，唔通有人戴晒頭盔，就係預咗有呢個場面出現？
首先同徐英偉講「Hi」
還記得CY於競選一二年特首選舉期間有開過官方fb，直至一二年三月廿五日當選特首後停用，而事隔三年半，CY忽然用真名開帳戶。尋日下午約二時，帳戶名稱為梁振英（CY Leung），頭像圖片為CY企喺禮賓府花圃，身穿「家是香港」白色T裇，不過唔係所有人都可以加佢做朋友，多數人只能追蹤佢嘅近況。
CY首個舉動係同民政事務局局長政治助理徐英偉留言講「Hi」，徐英偉回覆「Welcome to Facebook」，徐其後回應政界中人查詢時證實呢個帳戶屬於CY本人，隨後亦陸續有政府中人成為CY嘅fb朋友，如據稱亦係尋日先開fb嘅教育局局長吳克儉，以及政制及內地事務局副局長陳岳鵬、發展局政治助理馮英倫等人。
不過，CY忽然開fb，唔通唔怕畀人鬧爆？其實CY同佢團隊做晒準備，一早戴晒頭盔及着晒盔甲去避網民四方八面嘅明箭同暗箭，包括設定帳戶唔畀網民留言，只可以讚好同分享貼文，不過一批網民都唔係省油嘅燈，有人提出要檢舉CY嘅fb，因此CY帳戶懷疑受影響「被消失」，突無法載入頁面，約一個鐘後先至回復正常。
CY嘅帳戶其後回復正常後，貼出多張花朵嘅照片，留言話「很多朋友經常同我交換種花照片同心得，尋日開facebook會同大家分享花菓樹木同生活照片，希望大家欣賞」，但及至晚上八時許，CY帳戶突然又「被消失」。
或因被檢舉次數太多
有資訊科技界中人分析，帳戶「被消失」，一是用戶自行關掉頁面，另一可能係畀網民檢舉次數太多，究竟邊個先係真相，只有當事人至知嘞！