中環出更：「一舊雲」鬧完前黨友即收番
民主黨（白鴿黨）立法會議員黃碧雲（一舊雲）最近頻頻對外月旦時事，最新忽然喺社交網站留言，質疑兩名白鴿黨前成員周奕希同黃逸旭於區議會換屆選舉，預料無競爭對手下自動當選係另有原因，不過一舊雲亂發炮亦疑知理虧，不足半日就淆底自行刪去有關留言。
一舊雲首先質疑，周奕希最近加入新嘅議政平台「新思維」，呢個可能係典型嘅退黨保平安，又批評黃逸旭於二○一二年突然跨區參選立法會九龍西地方直選，事後就無再喺該區，直指當時有傳對方參選受指使去（界刂）泛民票，質疑無人挑戰同背後有政治因由有關。
知衰後急删社交網留言
其實只要熟悉地區形勢，就知道周奕希同黃逸旭於地區打滾多年，其中前者更任葵青區議會主席多年，周奕希接受查詢時亦話，唔想浪費時間去回應是非。
可能一舊雲亂發炮後都知衰，不足半日後就自行刪去批評周黃二人嘅部分，有人笑言或者周黃二人可以套用一舊雲嘅黨友，即白鴿黨主席劉慧卿嘅金句用作反擊之用，即係「我選舉嗰時你都唔知喺邊度」嘞！
卓妮