中環出更：夏日打呔苦 「衍」商務便裝
扮靚始終係女士強項，男士想喺衣着上玩款，似乎只能打領呔嘅主意。尋日沙田馬場舉行東方表行沙田錦標及精英碗賽事，東方表行主席楊明標及兒子兼董事總經理楊衍傑（Dennis）等男士，都戴上五顏六色嘅煲呔，襯晒「時尚煲呔日」嘅主題。Dennis話，香港男士夏天仲要打呔真係好辛苦，佢平時返工寧願着商務便裝（Business Casual），打呔可免則免喎！
對紅色領呔情有獨鍾嘅馬會大董陳南祿都有到場，佢笑稱屋企都有煲呔，但因為唔識打所以好少戴喎！東方表行董事林慶麟就話，比起傳統領呔，其實煲呔既方便又便宜，間唔中戴吓都幾好玩。據知今年係首屆「時尚煲呔日」，明年將會繼續舉辦下去，希望為男士衣着增添些少玩味。
楊明標望唔透鐘錶前景
天寶鐘表主席梁青華、香港珠寶玉石廠商會會長冼雅恩及做物流生意嘅香港國術總會會長王嘉恩（Albert）等人都有到場支持。講起日前汲水門大橋疑遭躉船撞到，事後因封橋令大嶼山成為孤島，Albert話，自己公司冇受今次事件影響，因為佢哋嘅業務多數經陸路運輸，而唔係經空運，所以好好彩。
零售市道差，鐘錶業感受最大，業界老行尊楊明標慨嘆，對後市睇唔通透，預計低迷氣氛將延續至明年，甚至後年。佢話，有國際品牌因應市場變化，亦轉為生產平價款式，事關貴價錶真係好難賣，業界惟有捱吓寒冬咁話。
卓妮