西灣河：過路處欄杆撞彎無人理
「個欄杆唔知係咪畀車撞到變晒形，不過都唔見有人圍住佢維修！爛咗搞到冇晒保護作用，萬一再有車撞埋去咪爛得仲緊要！」陳小姐近日途經西灣河筲箕灣道，發現行人過路處有欄杆損毀，鐵枝已扭曲變形，質疑部門對道路設施保養不足，希望加強巡查，確保設施狀況正常。
路署接轉介即維修
路政署發言人表示，接獲本報轉介投訴後，即時派員實地視察，發現上址行人過路處有欄杆損毀，懷疑曾被車輛碰撞。該署隨即安排承建商進行維修，而維修工作已完成。「整番好就好啦，但希望以後就算未維修都盡快封住佢，或者放個牌喺度，等啲司機注意吓！」陳小姐認為路政署仍有改善空間，希望就維修工作作出檢討，以保障道路使用者安全。