早排天津危險品倉庫爆炸，造成死傷枕藉，令人觸目驚心。好多市民以為事不關己，香港唔會發生呢啲慘劇，其實咁諗就錯嘞，香港遍地都市炸彈，危機四伏，隨時爆大鑊嘅咋。
唔使講咁遠，淨係成行成市嘅非法油站，就係一個個計時炸彈。當局二○一一年取消「綠卡計劃」後，從事運輸及物流等公司，可以直接以優惠價向油公司購買柴油，懷疑有人走法律罅，將柴油分銷畀街車以賺取差價，搞到亂象叢生。本報記者實地觀察，發現呢啲非法油站其門如市，做到冇停手咁滯，弊在安全毫無保障，有人甚至一邊入油一邊煲煙，睇見都牙煙喇。
咁都未算吖，有非法油站仲位於政府物料營運中心隔籬添，一旦起火，隨時波及入面儲存嘅危險品，分分鐘重演天津爆炸慘劇都似！
話時話，由於有利可圖，非法油站愈來愈普遍，有啲甚至公然喺生產氣體嘅廠房旁邊做生意。講到尾，有需求就有市場，非法油站大受歡迎，皆因油價加快減慢囉。有運輸業界人士就講得啱嘞，油公司對大公司供油價格低一大截，相反對散客就一個仙都賺到盡，兩者價錢相差倍幾；加上好多油站地方淺窄，經常大排長龍，搵食車司機為咗節省時間，咪轉而幫襯非法油站囉。
最離譜嘅係，面對咁大個計時炸彈，消防處居然闊佬懶理，關人個關，連相關檢控數字都欠奉。有前線人員係咁講嘅，經營非法油站嘅好多都係有背景人士，當局欺善怕惡，咪唔敢執法囉。其實，之前消防處成立特遣隊，話就話要打擊非法油站，但當時已畀人睇死得個樣，事關消防員既冇刑事調查訓練，亦缺乏執法所需武力，處方多此一「隊」，根本就係為咗開位請人，翻閹自己友。
所以話，官僚靠得住，豬乸會上樹，旨意消防處把關，蚊都瞓蛇都死喇。呢，早前造成三人死亡嘅慈雲山車房大爆炸，揭發當局發牌、巡查以至執法都甩甩漏漏，咪就係最典型例子囉。今時今日，消防隱患多多，除咗非法油站危機四伏，舊樓、劏房、危險招牌等亦成為計時炸彈，令人防不勝防，如果唔係官僚敷衍塞責，胡混度日，市民就唔使成日提心吊膽喇。
咪話功夫茶唔提醒，今日社會紛紛擾擾，爭拗不斷，市民已經夠晒煩，一個唔好彩再搞到死人冧樓，盞激起更大民怨嘅咋！