政情：遭標籤「反佔中」 陳曼琪話歧視
喺佔旺禁制令案中代表潮聯小巴嘅律師陳曼琪，一度被外界稱為「反佔中律師」，最近佢被政府委任為嶺南大學新任校董，結果惹嚟學生反彈。陳曼琪尋日正式上任嶺大校董，佢就否認自己係反佔中律師，對於被外界標籤，覺得有好大壓力，甚至覺得遺憾。不過，佢又自稱無畏無懼，只係收到指示去打官司，亦解釋成為校董與政治無關。
陳曼琪仲話，自己受到歧視，其專業操守已經受到政治化，希望外間唔好再歧視佢，唔好再利用佢做過嘅案件去標籤佢。佢又話，自己有六年時間擔任校董，有經驗服務嶺大。問到會點樣同師生溝通，陳曼琪話會私底下同校董會成員溝通喎。對於學生會建議修改大學條例，佢認同有討論空間，但因為尋日首日上任校董，所以未收到學校文件，未能即時表態。