立法會尋日舉行特首答問大會，多名議員都問到關於「去殖民化」問題。其中衞生服務界議員李國麟問到，近日本港郵筒上嘅皇冠標誌被遮蓋，香港會唔會好似日本咁刪除歷史？點知特首梁振英（CY）回答問題時就誤將李國麟叫咗做教育界議員葉建源。
唔知係咪因為李國麟及葉建源兩人都身形高瘦戴眼鏡，定係兩人知名度較低，令CY認錯呢？李國麟喺答問大會上話，有個五歲小朋友同佢講，話近日有郵筒唔見咗，唔知香港會唔會好似日本咁刪改歷史，又話禮賓府及香港大學都係英國人興建嘅，唔知禮賓府又會唔會因為被拆掉，唔可以再睇杜鵑花，亦唔知港大校政會唔會不斷被干預。
CY回應話，喺回歸前已經討論有關問題，又話有關問題唔會向國家主席作匯報。但CY回答問題期間，就誤將李國麟叫咗做「葉建源」，之後先至更正。李國麟就回應話︰「歷史上我叫李國麟議員。」
