政情：佔領磨心 中學呻慘
舊年發生嘅七十九日佔領行動（佔中），好多人都將注意力放喺學生團體及領袖身上，反而學校嘅處境就被遺忘。喺佔領行動爆發前，分別有支持及反對佔中嘅團體發起若干行動，當中包括學民思潮召集人黃之鋒向中學生派發罷課傳單；反佔中嘅團體如正義聯盟召集人李偲嫣派傳單反罷課外，有團體更設立舉報熱線，呼籲舉報鼓吹罷課嘅師生。有校長就慨嘆支持及反對佔中團體嘅舉動，令學校陷入極端勢力拉扯，慘成磨心。
港大教育學院、香港中學校長會及政策二十一由今年六月開始，向全港四百九十八間中學嘅校長、喺佔中期間任教中五及中六嘅教師發出問卷，了解佢哋對佔中嘅取態，以及如何看待佔中後嘅學生。調查最終獲得一百六十八間學校回應，包括一百三十一名校長及一千四百一十一名教師。調查結果顯示，近九成學校有學生要求響應罷課，亦有八成幾學校有學生提出反對罷課。罷課形式方面，學校容許罷課學生喺校內集會討論、自修、甚至請假或曠課。
為保政治中立 心力交瘁
調查機構指，學校面對罷課及佔中嘅主要原則係保持政治中立，以及鼓勵學生作多角度思考。不過，亦有部分學校嘅原則係遠離政治、唔支持學生參與佔中，同埋勸喻學生避免參與佔中。雖然分別有接近五成教師認為，佔中無對學生嘅學業及師生關係造成影響，但仍有一成幾人認為有消極影響。此外，有部分人認為佔中對學生嘅個人品行、態度及社會認知造成負面影響。
香港中學校長會主席李雪英就話，舊年九月初，面對不同勢力想爭取中學生支持或反對佔中，學校陷入極端嘅勢力拉扯。佢又話，當時校方嘅心態好矛盾，一方面擔心討論佔中會觸動學生情緒，但又擔心唔討論會失去先機。除咗上述團體，辦學團體、家長及校友都會對校方構成壓力，例如有校友喺報章刊登廣告促請校方表態。作為校長，最唔想學校捲入政治漩渦，亦唔想政治勢力令學校難以保持中立。一場佔領行動，相信令唔少校長同教師心力交瘁。