中環出更：海口聯誼會誕生 朱鼎健助年輕人尋夢
提起有「東方夏威夷」之稱嘅海南島，唔少人即諗到陽光與海灘。對於三十幾歲就接手龐大高爾夫球場王國嘅觀瀾湖集團主席朱鼎健（Ken）嚟講，海南係佢搵到一片天地嘅夢土，事關佢一手打造海口觀瀾湖度假區，將家族事業推上另一高峰。Ken近期更創立香港海口聯誼會，並擔任創會會長，希望促進海南及香港嘅交流，令更多年輕人喺內地搵到發展機會。
身兼聯誼會常務副會長嘅博愛醫院副主席陳李妮係地道海南姑娘，佢經常帶朋友去海南旅行，次次返港必帶海南知名嘅文昌雞做手信，一次過閒閒地帶十隻。佢笑稱，帶雞入境只要煮過就唔會有問題，依家仲有真空包裝服務，夠晒衞生方便。
張學修嘆商界請人難
同Ken攜手打造海口蘭桂坊嘅蘭桂坊主席盛智文、中華出入口商會會長張學修都有到場。張學修話要幫商界發聲，因為出入口係香港三大經濟支柱之一，去年貿易總額達一萬億美元，就業人口達五十萬，但經營環境嚴峻，業界請人好難，冀政府諗計解決。
卓妮同場仲見到工業界立法會議員林大輝，佢話同Ken嘅爸爸朱樹豪相識多年，當年一齊踢波時嘅點滴講都講唔晒。記得有次佢哋贏得足球賽冠軍，朱樹豪將九樽啤酒倒落獎盃中，然後一飲而盡，豪氣之情至今難忘。
卓妮