喺古代社會，經常出現土皇帝，隻手遮天，為所欲為。今日香港號稱法治社會，但亦唔好得幾多嘅咋。
唔係講笑o架，根據現行法例，防賄條例不適用於特首，成為防貪工作嘅一大漏洞，特別係前特首曾蔭權爵士被踢爆連串醜聞，結果被廉政公署起訴兩項「公職人員行為失當」罪，有關問題更加備受關注。所以咯喎，有政客借題發揮，打算喺立法會提私人草案，將特首納入防賄條例規管範圍，並要求設立獨立委員會，負責批核特首收受利益。議員係咁講嘅，現行制度明顯存在缺陷，加上曾蔭權及前廉政專員湯顯明其身不正，如果當局唔肯接納有關私人草案，勢必為社會傳遞錯誤訊息，隨時令到貪腐風氣死灰復燃。
冇錯嘞，王子犯法與庶民同罪。就算喺封建時代，高官權貴都要受法律管束，有乜理由香港特首可以例外吖？尤其係香港號稱法治之區，港府阿一居然凌駕於法律之上，點講都唔通喇。當年曾蔭權被踢爆接受富豪款待，引起社會嘩然，港府煞有介事成立獨立委員會檢討特首潛在利益衝突問題，委員會最終提出三十六項建議，包括將防止賄賂條例擴大至適用於特首，點知事隔三年，當局依然闊佬懶理，又唔跟進，又唔諗辦法堵塞漏洞，難怪授人以柄，淪為反對派政客嘅彈藥喇。
話時話，特首獲豁免防賄條例，何止法律講唔通，更加係政治不正確喇。內地近年大舉反貪，懲處貪官絕不手軟，老虎蒼蠅一齊打，甚至連「刑不上常委」嘅鐵律都打破，反觀香港反貪半桶水，大搞「刑不上特首」，咁咪即係話畀全世界聽，港府阿一地位仲「超然」過北大人？港府反貪搞「一國兩制」，廉政工作連內地都不如，唔止係丟架，簡直係自毀長城吖！
所以話，香港話就話係法治社會，法律面前人人平等，實際上只係假象嘅咋。普羅小市民觸犯條例，就算只係貪一蚊，當局又拉又鎖，又告又罰，而高官權貴同富豪勾勾搭搭，利益輸送，就乜事都冇，咁算得係乜嘢法治吖？正因為香港樣樣都唔公平，施政一味傾斜大財團，搞到深層次矛盾不斷惡化，整個社會深受其害，港府再唔撥亂反正，直頭與民為敵喇。
一句到尾，法律必須一視同仁。特首點「超然」都好，絕對唔可以超然於法律之上，否則，遲早出現更多張蔭權、李蔭權o架。