中環出更：理大頒院士 姚珏多粉絲捧場
香港理工大學昨向六名人士頒授大學院士榮銜，表揚佢哋對理大及社會嘅貢獻。獲頒榮銜嘅包括著名小提琴家姚珏、機場管理局前行政總監林中麟、工程師劉志宏、和富慈善基金主席李宗德、論壇組織「三十會」召集人李律仁及香港中華廠商聯合會前會長施榮懷。姚珏話今次係佢第一次獲頒院士，希望可以繼續於香港推廣音樂無分邊界的文化。
尋日有唔少理大學生去捧姚珏場，講起香港好多學生學樂器，但鮮有以此為職業，姚珏就認為音樂以唔同形式融入大家生活，又指香港有好多玩音樂好出色嘅學生，都係來自不同學系但對音樂充滿熱誠，即使佢哋將來不以此為職業都冇問題，當係一種興趣都足以為生活及周圍嘅人帶來好多正能量。
劉志宏透露，他與理大淵源甚深，事關佢同爸爸均係理大前身香港工業專門學院的校友，弟弟則是理工學院畢業生，太太就曾於理大擔任副教授。曾經做過黃大仙區議員的劉志宏話，好多社區設施都係由上而下規劃興建，過往佢於地區觀察唔同設計實用性，再由下而上提出改善建議，又笑言自己熟悉焊接喉管及紮鐵工作，佢做嘅喉管唔會有鉛水喎。
施榮懷話名銜屬廠商會
李宗德九七年成立「和富慈善基金」，於年前資助理大學生參加內地體驗計劃，又推動全人教育，尋日獲姐姐和兩個女捧場，晚上會和家人齊齊食飯慶祝。施榮懷就獲多位家人及好友到場支持，佢於台上致答謝詞時話，呢個院士名銜應該係屬於廠商會嘅，嘩，咁多個廠商會成員，個院士榮銜咪好難分？
卓妮