當年內地爆發文化大革命，係由校園革命開始，學生鬥老師，紅衞兵掌權，然後紅色狂潮席捲全國。諗唔到幾十年之後，呢一幕居然喺香港上演，學生要鬥倒校領導，政治紅衞兵要奪權，吵吵鬧鬧，永無寧日，簡直同文革有得揮。
嗱，香港大學因為一場副校長任命風波，爆出學生衝擊及禁錮校委鬧劇，近年被政治化入侵嘅嶺南大學不甘後人，亦上演類似事件。話說港府日前委任嶺大校董會新成員，其中包括旗幟鮮明反佔中人士，嶺大學生會揚言要推翻任命，尋日趁住校董會開會，動員學生抗議，喺會議場地外面高叫口號，推倒鐵馬，仲堵塞會議室門口添。最離譜嘅係，當校董會負責人步出會議室同學生代表對話期間，一批學生突然發難強闖會議室，雖然最終行動失敗，但係已經引起一陣混亂。
有冇離譜啲吖，郁啲就衝擊，郁啲就圍堵，郁啲就佔領，當校園係戰場咩？嶺大以提倡博雅教育為使命，但係學生嘅行徑一啲都唔優雅，甚至係野蠻添。冇錯，學生擁有集會示威嘅自由，但係必須守法同守規則，如果一言不合就衝擊圍堵搞革命，咁仲成世界嘅？咁仲有規矩可言嘅？
民主嘅原則係包容不同意見，「我不同意你嘅觀點，但係誓死捍衞你說話嘅權利」，可惜部分大學生啱啱相反，佢哋唔同意某人嘅觀點，連某人說話嘅權利都要剝奪埋。本來，學校係社會嘅縮影，校董會內有不同政治光譜嘅人，係好正常嘅事情，但學生代表目空一切，視自己為正義化身救世主，將非我族類打成黑五類，全部要鬥垮鬥臭，趕出校園，咁同文革紅衞兵有乜分別。況且，佔領行動嚴重撕裂社會，如果人人都學嶺大紅衞兵咁，對睇唔順眼嘅學校領導圍剿攻擊，大學咪日日打大交？學生仲點樣安心讀書吖？
所以話，香港嘅大學國際排名食咗瀉藥咁一洩如注，唔係無道理（口架）。今時今日，學生唔係專心讀書，而係醉心搞政治，校園唔再係寧靜嘅象牙塔，而係鬥爭不斷嘅戰場，大學唔淪落至奇喇。話時話，隨着政治化入侵愈來愈嚴重，何止部分學生淪為政治棋子，好多教職員更加甘於做政治打手，有人將政治黑金引入校園，有人赤膊上陣策劃佔中，有人公然鼓吹學生違法，大學淪為反中亂港大本營，香港點會唔烏煙瘴氣吖。
一句講晒，大學淪為鬥獸場，教育樞紐成幻想。早前港大爆出衝擊校委會爭議，「明德格物」變成「失德格鬥」，今日嶺大發生圍堵校董會事件，「博雅教育」亦變成「博鬥教育」，一樣令人大失所望。香港教育不斷沉淪，如果孔夫子在世，一定講句：吾不欲觀之矣。