黃毛小子要求將立法會參選年齡限制由二十一歲降至十八歲，明眼人都知佢已深知做街頭鬥士只能係死路一條，無錢途，倒不如博一博，睇吓可唔可以少年得志，翻身做「尊貴嘅議員」！
之不過，佢如此性急，連二十一歲也等不來。同文話齋：讀書不成三大害，斷估佢唔會讀過梁啟超《少年中國說》而深明「少年聰明中國就聰明，少年富裕中國就富裕，少年強大中國就強大」嘅道理。梁啟超當年把希望寄託在中國少年身上，皆因其時日本和西方列強污衊中國為「老大帝國」，而當時嘅封建官吏確又真係十分腐朽。
如今，時勢改變，相信梁啟超如果見到改革開放後嘅中國，對青少年又會有另一番嘅體會，佢一定唔會認同少年衝擊社會、無視法治會係中國嘅希望！
黃毛小子唔明年齡不是從政重點，能力才最重要，否則，佢唔會在聲明一開頭就話：「香港政壇生態並不健康，立法會議員平均年齡高達五十七歲，老化問題引人咎（詬）病……」又狂言亂語把「老人政治」掛在口邊，唔怪得惹來不少批評。
阿哥，家陣五、六十歲從政有乜問題？列根六十九歲當選美國第四十九屆總統，一九八四年佢七十三歲競選連任成功，可見立法會平均年齡「高達五十七歲」係黃金組合，一啲唔老！黃毛小子睇怕以為做議員要好似選o靚模咁，最好十八歲卜卜脆，若然童顏巨乳就更正？
黃毛小子以為自己一旦有機會進身議會，就會為議會帶來一番新氣象？好心佢唔好以為做不成街頭鬥士，一個華麗轉身就可做尊貴嘅議員啦，人哋掟蕉收十皮一個月，之不過人哋真係飽讀詩書辯才了得！趁青春，不如修心養性，返屋企閉門讀多兩年書，二十一歲再行出來，也許有機會改變吓氣質，唔再扮Chok嘴藐藐先去參選喇！