政情：黃傑龍鬧爆東亞銀行
相信各位讀者都收過唔少來自銀行、財務公司或保險公司嘅真人直銷電話，問大家借唔借錢同買唔買保險，有時真係煩到嘔！咪以為淨係一般平民百姓先至要受呢啲苦，有錢人同知名社會人士都一樣走唔甩，其中叙福樓集團執董兼最低工資委員會委員黃傑龍（Simon），尋日就喺社交網站作出大控訴，自爆畀李國寶做主席嘅東亞銀行纏擾，呢頭叫停咗真人電話直銷，嗰頭又整封信畀佢，話多謝佢同意畀銀行使用佢嘅個人資料作直接促銷用途。原來東亞係講緊會改以電郵或手機短訊方式繼續向佢直銷，真係就嚟煩死喇！
黃斥回信內容「倒轉嚟講」
Simon同我哋講，東亞銀行早前幾乎日日都打電話畀佢，問佢使唔使借錢。佢一直都好禮貌咁拒絕，後來實在打得太多次，搞到佢頂唔順，下定決心透過上網登記，表明拒絕再收到同類訊息。
不過，東亞銀行並未因而「放過」Simon，隨後派員再打電話畀佢，一方面確認已收到佢嘅網上登記資料，但另一方面又問佢，如果真人直銷電話唔想收，咁電郵同手機短訊又點呢？Simon一時「心軟」答冇所謂喇！點知幾日後就收到東亞來信，話「已獲你嘅口頭同意，使用你嘅個人資料作直接促銷之用」喎，同佢喺網上登記嘅原意完全相反。
其實東亞封信所指嘅直接促銷，相信係講緊電郵同手機短訊。Simon就批評信件內容完全「倒轉嚟講」，正確寫法應該係，知道佢已拒絕再收到直銷電話，咁先可以令人安心。佢直言睇完封信之後覺得好冇安全感，擔心東亞會再打電話畀佢。如果真係咁，佢一定會認真投訴。
東亞銀行稱系統自動發出
東亞銀行回覆本報查詢時解釋，Simon填嗰份係網上查詢表格，東亞已確認收到佢嘅要求，日後唔會再收到佢哋嘅電話。至於嗰封信係由電腦自動向客戶發出嘅確認信，旨在確認客戶同意透過部分渠道接收直銷訊息，但唔會列明詳細內容。東亞對該信引起客戶誤會同不便表示歉意，承諾會不時檢討以改善服務。