中環出更：單刀赴「會」 陳岳鵬被寸「堅離地」
政制及內地事務局副局長陳岳鵬（Ronald）首次單拖出席立法會「甩轆」，被民主黨主席劉慧卿（卿姐）批評「堅離地」！立法會政制事務委員會尋日討論，當局建議立法會選舉候選人資助額由目前每票十二元增至十四元，會上多名議員質疑當局嘅資助計劃有太多關卡。
畀黃碧雲噏錯主修科
卿姐嘅黨友黃碧雲，以九龍西地方直選增至六席為例，預料該區最後一席當選者或只須三萬票，按每票十四元資助推算，預料只可取回四十二萬元，擔心對於財力較遜的候選人會造成不公平競爭，直指Ronald身為「史丹福大學嘅數學（系）」，應該就此計算一下。翻查資料顯示，Ronald非就讀史丹福大學數學系，而係主修政治及比較社會學。
卿姐發言時，則多次追問Ronald等官員，過去有多少候選人可以取得申報選舉開支嘅一半資助，又質疑當局係咪有心幫助候選人，Ronald就重申當局資助計劃原則，並稱候選人理論上有機會獲得所有選舉開支資助。卿姐隨即反擊，批評Ronald「唔好堅離地」，要實際看一看相關數據，更指「你估我未選過舉，我選舉嗰時你都唔知喺邊度。」
卓妮