太史公司馬遷曾經講過，「法令所以導民也，刑罰所以禁奸也。」意思好簡單，法令用嚟教導人民，刑罰用嚟對付奸徒，亦即係法治咁解。今日香港話就話係法治之區，可惜得個虛名，港府親疏有別，司法亂象叢生，法治蕩然無存，簡直連古人都不如。
呢嗱，壹淫媒旗下嘅《蘋果日報》及已停刊嘅《爽報》，早前被判處藐視法庭罪成，以為今次可以彰顯法律及正義喇，點知司法機構又係高高舉起，輕輕放下，涉案兩報及兩名時任總編輯統統獲得輕判，合共僅罰款五十五萬元，引起社會嘩然。按照司法程序，律政司本來可以提出上訴，要求法庭重新考慮判刑，可惜最後竟然自動放棄，呢單性質嚴重、影響惡劣嘅刑事案就咁不了了之，令法治再次蒙污。
不可不知，壹淫媒已有多次藐視法庭嘅前科，被告亦承認今次「愚蠢、應受譴責和處罰」，結果所謂嘅處罰只係區區五十五萬元，真係講都冇人信。正如有人話齋，壹淫媒早已係「積犯」，案例多多，今次仍獲輕判，律政司放棄上訴，做法離譜，開咗極壞先例，有損市民對法治嘅信心；亦有人質疑，係咪因為壹淫媒老闆淫賤黎同外國勢力勾結，有權有勢就唔怕犯法？
冇錯嘞，壹淫媒之所以不斷獲得放生，唔止因為有外國勢力撐腰，亦因為有港英餘孽護航。除咗藐視法庭之外，壹淫媒多年來觸犯《淫褻及不雅物品管制條例》而被判罪成嘅個案已達到一百三十幾宗，幾乎厚過電話簿咁滯，但每次都係輕輕罰款了事，多則幾萬，少則幾千，唔夠淫賤黎食餐飯飲支酒，你話有乜阻嚇力吖？老實講，如果當局依法辦事，有人就算唔坐監，亦可能被罰到破產，仲可以咁風流快活咩。
所以話，香港嘅所謂法治根本係呃鬼食豆腐，所謂法律面前人人平等更加係吹水唔抹嘴。有人就講得啱嘞，香港法律好似橡筋咁，可以任意伸縮，唔止有雙重標準，甚至有三重標準添。就講淫賤黎吖，佢嘅黑金醜聞已經曝光一年幾，佔領之亂亦爆發超過一年，當局查到依家仲係無聲無息，如果話當中冇蠱惑，三歲細路仔都唔信喇。
正所謂，不近情者多藏奸。香港話就話已回歸十八年，實際上同回歸前冇乜分別，今日可以見到嘅仍然係，愛國愛港無前途，反中亂港有運行，講起真係諷刺。唔怪得北大人慨嘆，香港回歸後唔止冇「去殖民化」，反而「去中國化」。可惜吖，一味慨嘆都解決唔到問題（口架），北大人畏首畏尾，坐視餘孽漢奸興風作浪而唔敢撥亂反正，香港唔烏煙瘴氣至奇吖！