中環出更：「退休」唔搞企業 「鼎」力創新品牌
傑出青年協會一班骨幹早前齊齊出席一場慈善首映禮，有份贊助嘅慈善家李惠利外孫高鼎國（Geoffrey）同太太張尹馨帶埋好多朋友去睇戲，Geoffrey母親、即李惠利女兒Betty亦有到場支持。Geoffrey早前話要「退休」五年，消息揚開後嚇親好多朋友，以為佢真係乜都唔再理，咁後生亦冇理由退居二線。
Geoffrey笑言好矛盾，因為最近佢開始投入打造一個新錶品牌，笑言「退休」嘅意思係由一個企業家變成創業家喎！佢接手由外公李惠利創立嘅鐘錶生意，旗下有百年歷史嘅瑞士名錶品牌，生意早已上晒軌道，但佢卻走去湊新品牌，仲話預咗會辛苦，不過做人唔好怕辛苦，最近佢同學生分享做生意心得時，就教佢哋要時刻抱住「今日做唔到，聽日就會執笠」嘅心態，咁樣先至會成功。
余嫿睇戲「忘我」減壓
傑青協會前主席龐愛蘭（Scarlett）、傑青兼設計師余嫿（Mary）都有到場。Scarlett買飛請戒毒中嘅青年睇戲，希望藉此令佢哋由令人沉淪嘅環境中走出來。其中有位少女想入美容行業，Scarlett就即刻介紹佢畀美容院嘅朋友添。
Mary最近嘅設計工作一個接一個，唔通佢要入場睇戲搵靈感？Mary笑笑口咁話唔係，入場睇戲嚟減壓就真。佢話，睇戲時至少要將自己放空，然後投入戲中主角嘅世界，減壓效果一流喎！
卓妮