逆水行舟，不進則退。求學係咁，辦學亦係咁，近年本港大學嘅國際排名好似食咗瀉藥咁，一瀉再瀉，沒有最低，只有更低，咪就係不思進取，自甘墮落囉。
呢，最近公布嘅幾項大學排名榜，香港多間大學幾乎齊齊插水，尤其係美國一份雜誌嘅「全球最佳大學排行榜」，香港大學更由舊年嘅四十二位急跌至六十四位，由亞洲第三淪為亞洲第五，被北京大學以及新加坡國立大學等遠遠拋離；而喺另一項調查，港大更加被本地其他院校爬頭，失去龍頭地位。正如「東方報業民意調查」顯示，大部分受訪者認為校園政治化影響教學質素，削弱競爭力，再咁落去，排名可能仲有排跌添吖。
正所謂，自作孽，不可活，港大排名跌跌不休，唔係無原因（口架）。英國《泰晤士高等教育》日前公布嘅全球大學排名榜，港大連續第五年下跌，而且跌出亞洲三甲，主要就係因為知識轉移表現唔理想，研究結果未能轉移到產業。呢，早前港大派隊參加美國機械人挑戰賽，結果耗資一千五百萬元嘅參賽作品行咗幾步就跪低，簡直丟架。
堂堂百年學府點解淪落到咁嘅田地？答案好簡單，校園愈來愈政治化，教師無心教書，學生無心求學，結果咪搞成咁囉。大家有眼見，近年港大幾乎淪為政治鬥獸場，有人鼓吹違法佔領，有人收受政治黑金，搞到烏煙瘴氣，尤其副校長委任風波更加引起滿城風雨，有人甚至威脅要罷課添。人哋大學專心做學問，香港就專門搞政治，排名跌仲係小事，遲早搞死自己嘅咋。上述調查顯示，大部分受訪者批評港大經常捲入政治，唔單止損害學習環境，更導致國際形象大打折扣，簡直係一語中的。
當然喇，今日香港樣樣都唔掂，港大嘅衰落只係大專教育不斷沉淪嘅縮影咋。日前喺香港舉行嘅美國大學學能傾向測驗，吸引逾萬名學生參加，其中近九成來自內地，反映愈來愈多內地學生捨港取美，以前爭相來港讀書嘅熱潮已經一去不復返。咁又難怪嘅，香港七國咁亂，係人都怕怕喇，你估內地家長唔擔心自己仔女變成街頭鬥士咩！
難為前朝政府仲口口聲聲發展教育產業，家陣大學連最基本嘅「傳道授業解惑」都做唔到，所謂發展教育產業，根本就係吹水唔抹嘴。正如多數受訪者話齋，教育產業完全失敗，反而弄巧成拙，亂象叢生。
講到底，一個地方陷入政治泥沼，注定冇運行，港大係咁，成個香港亦係咁，睇怕好快就會變番小漁村嘅喇！