節季隨時變，風水輪流轉！想不到「中文佬」竟然有翻身之日——據云有補習社開出天價年薪八千五百萬元向對手挖角，邀請一位中文科的補習名師加盟，只要肯簽約，即時可獲得三千萬元「誠意金」，同文嘆曰：萬般皆下品，唯有補習高！亦有大學講師雀躍：過去靠中文謀生者，大多予人生活潦倒的感覺，如今有人教中文可得到國際體壇明星般的收入，不少中文人或許可以大聲喊句：「終於輪到我們翻身囉！」
千秋萬歲後，誰知榮與辱！「中文人」是否可以翻身，看來言之尚早！畢竟這只是「個別例子」，老朽呢個如假包換嘅「中文人」，教了大半輩子中文，亦賣文逾半個世紀（十二歲開始投稿「學生園地」，當年五毛錢一碗魚蛋粉，老朽可以每月賣文穩得七、八十元，足以用來溝女購閒書）；如今「西風一夜催人老，凋盡朱顏白盡頭」，依然靠中文謀生，只是不再誤人子弟，塗塗寫寫，亦自得其樂矣！不至於如粵語殘片，教中文嘅吳楚帆，居危樓，臨近新年，家徒四壁，看着對面樓層一幅對聯「油條已貴，燒餅更昂，看指數才漲三成，勒緊肚皮辭舊歲。破帽難縫，寒衣未剪，念物價早過十倍，裝何面目拜新年？」然後情深款款看着熟睡嘅妻女，之後白手帕咳出一口血……
中文老師竟活得如此淒酸，難怪老爸也叫我「切勿入讀中文系」，之不過，老朽科科唔掂，唯獨中文稱霸，讀理科竟唔敢去考數學，說起來真窩囊！之後靠教中文搵三餐！私校當道時，老朽在一所女子中學教會考班中文、中國文學，我只教學生每課古文都要倒背如流，懂得每句意思，知道主旨，則無論考乜，加以發揮，唔會衰得去邊，五年下來竟然也教出唔少中文、文學考Ａ者，可惜當年補習仍未盛行，否則老朽亦應忝為「中文補習名師」！