政情：陳正欣拒「去繁就簡」迎客
為咗迎合內地遊客，城中好多旅遊服務及零售店舖都轉用簡體字。做鐘錶及時裝生意嘅保良局總理陳正欣（Daniel）就唔係好認同，佢話繁體字係香港特色，不宜改變，而且好多內地人都睇得明大部分繁體字，若要畀內地旅客有賓至如歸嘅感覺，練好啲普通話比寫簡體字更來得實際。
練好普通話更實際
Daniel話，論字形，好多簡體字同繁體字都好接近，對睇慣簡體字嘅內地人嚟講，繁體字唔會構成閱讀上嘅障礙，而佢所認識嘅內地朋友亦都唔會抗拒繁體字。佢認為，除非係涉及法律條文或合約，否則根本唔使寫簡體字遷就佢哋。況且一旦香港舉目都係簡體字時，於內地人眼中又仲有幾多香港特色可言呢？
Daniel認為，倘若有內地遊客睇唔明某啲繁體字，港人可以透過言語解釋。當然，要同內地人溝通無障礙，咁就梗係要練得一口流利嘅普通話喇！