政情：中環出更：三大學生會「返頭嫁」學聯開記招
各大專院校於佔領行動後爆出退聯風波，最後八大院校有四間都成功通過公投退出學聯。不過，香港大學、浸會大學及理工大學學生會尋日就忽然「返頭嫁」，聯同學聯一齊召開記者會，公布有關喺各院校發起嘅「大專修例公投」安排。明明早前先同學聯劃清晒界線，依家又藕斷絲連一齊開記招，十足細路仔玩泥沙。
擬明年推「大專修例公投」
港大副校長人選風波餘波未了，學聯副秘書長黃嘉輝尋日宣布會聯同八間專上院校嘅學生會，包括港大、浸大、理大、中文大學、科技大學、嶺南大學、公開大學及教育學院，分別喺各院校搞「大專修例公投」。佢地話依家大學條例係特首自動成為各大學嘅校監，同時有權力委任校委會及校董會成員，認為條例會干預大學內政及學術自由，所以要求修改。
修改大學條例嘅方向有三個，包括廢除特首校監必然制、增加校董會及校委會校內人士嘅比例及增加學生校董。大部分院校嘅學生會都話，會喺各院校舉行會員大會討論，希望年底前達成共識，於明年二月搞公投。
卓妮