政情：中環出更：敵龍提名 楊大偉膺傑青
國際青年商會香港總會尋日公布「十大傑出青年選舉2015」選舉結果，近年積極宣揚素食概念嘅社企Green Monday聯合創辦人楊大偉（David）亦當選為今屆傑青，但提名佢嘅竟然係開燒肉店嘅前傑青、叙福樓集團執董黃傑龍（Simon）。此外，臨床心理學家張依勵、眼科醫生李琬微及兒科醫生洪之韻等亦躋身傑青之列。
經營不同類型食肆嘅Simon坦言，佢同David本應係天敵，但David令佢體會到素食嘅重要性及社會多元文化，認為要接納社會上唔同立場及文化嘅人，於是連佢哋燒肉店都增設素食餐單供客人選擇，認為呢個概念健康及值得鼓勵。
勉後生仔勇於實行想法
David就話，幾年前萌生推廣素食念頭時無諗過會咁多人支持，強調每個人嘅一個小習慣，都可以幫助改變大環境問題，又勉勵年輕人，有諗法不妨勇於實行。
另一出爐傑青、臨床心理學家張依勵，去年曾到西非利比里亞參與為伊波拉病人及家屬進行心理輔導工作，並喺當地電台提供輔導節目。佢認為，香港人嘅心理健康狀況不及發展中國家，因社會低層承受好大壓力，希望未來可以做更多相關輔導工作回饋社會。
對於現時本港有不少在職貧窮人士均擁有學位但仍難以脫貧，洪之韻認同人工的確令年輕人感到挫敗，但問題短期內難有改善，而香港嘅情況「比上不足比下有餘」，年輕人可挑選自己熱衷嘅工作，從薪金以外找到其他工作嘅滿足感。李琬微則指，每年都有不同界別人士當選傑青，佢哋會協助年輕人尋覓更多培訓機會，擴闊佢哋社交網絡。
卓妮