大學迎新活動五花八門，無奇不有，經常畀人批評意識不良，其實，比起消防「玩新人」嘅醜聞，呢啲只係小兒科咋。
有前線消防員日前喺網上爆料，指一名消防隊目及多名消防員去年涉及集體「欺凌新出班」，有人報稱被同袍剝褲性侵，包括以手淫方式欺凌，事主不甘受辱，除咗向上級及同袍透露「唔開心」，而且報警求助。消防處處長黎文軒證實，多名涉事消防員停職接受警方調查，但強調今次只係個別事件，如發現違規行為，處方會嚴肅處理，包括進行紀律聆訊及行動喎。
堂堂紀律部隊，竟然好似小學雞咁，唔止欺凌新人，而且玩啲咁變態嘅「遊戲」，仲有冇離譜的吖。最得人驚嘅係，據講類似欺凌手法喺消防處內部已經係不成文嘅文化，除咗玩新人，亦會用嚟「教訓」態度不佳嘅同袍，有時甚至利用各種道具，務求令被虐者更加痛楚，曾經搞到有人因為頂唔順而辭職添。見微知著，今次醜聞可能只係冰山一角咋，究竟有幾多受害人敢怒不敢言，真係冇人知（口架）。
所以話，紀綱一廢，何事不生，消防處內部管理混亂，爛到入心，唔怪得烏煙瘴氣，醜聞多多，鑊鑊新鮮鑊鑊甘。呢，試過有消防員喺局內開聖誕派對，廣邀親朋好友之餘，更以消防裝備擺甫士影相；又試過有消防員當值時隊酒賭錢，直頭當消防局係遊樂場。消防官僚不務正業，耍樂多過工作，畀人叫做「消閒處」，唔係冇道理（口架）。
冇計喇，上樑不正下樑歪，高層其身不正，基層自然有樣學樣。大家有眼見，消防處內部流行擦鞋文化，每逢新處長上場，例必勞民傷財大搞檢閱騷，甚至不惜出動救人裝備做布景板。至於提拔自己友、集體秘撈等等，更加係家常便飯，大家早就見怪不怪。遠嘅唔講，現任處長黎文軒本身就醜聞纏身，曾被本報踢爆知法犯法，喺寓所僭建鐵閘，佢領導下嘅消防處唔七國咁亂至奇喇。
正所謂，一滴水看穿世界，消防處亂象叢生，正正係港府施政甩漏多多，烏龍百出嘅縮影。淨係一場鉛水風波咋，搞到滿城風雨，人心惶惶，到依家都唔知點收科，而官僚就一味卸膊，淨係識得向承建商及水喉匠開刀，問你服未。
始終都係古人講得啱，大者不能，小者不為，是棄國捐身之道也。港產官僚大事做唔到，小事做唔好，連消防處一個小小衙門都搞到烏煙瘴氣，醜聞多多，香港想唔沉淪都幾難。話時話，今次醜聞唔單止欺凌新人咁簡單，更加涉及刑事，唔該當局嚴肅追究，依法辦事，如果唔係，紀律部隊冇晒紀律，都幾難令人有信心！