政情：拗東江水質 陳鑑林舌戰大舊
政府官員頻頻外訪，立法會議員亦唔輸蝕，立法會發展事務委員會尋日就通過明年三月會到海外考察了解海水化淡技術，目的地暫定以色列或新加坡，認真識揀地方。繼金融界立法會議員吳亮星日前發表「鉛水會否延年益壽」論後，人民力量議員陳偉業（大舊）亦喺會上批評東江水水質，指港人多年來被迫飲「屎水」同「鉛水」，亦有調查顯示東江水內有唔少化學品，認為本港應該盡快研究海水化淡技術。
不過，議員陳鑑林隨即反駁，批評大舊講說話要經大腦，唔應該將港人飲用嘅東江水講成飲「屎水」，因為中央政府過去為確保香港食水供應及水質，一直已經係東江水做咗好多措施，咁講係污衊同歪曲事實。
考察海水化淡 「以星」擇一
佢又擔心，現時海水化淡技術成本昂貴，如發展有關技術，會令香港成為海水化淡嘅試驗場喎。既然海水化淡技術咁多爭議，係咪應該取消去以色列或新加坡嘅考察行程呢？