立會爭委泛民甩轆
本屆立法會最後一個立法年度展開，早前泛民主派向建制派宣戰，聲言要派人出戰爭奪各個委員會正、副主席之位。內務委員會及財務委員會正、副主席爭奪戰尋日率先展開，由於有指自由黨會倒戈撐泛民，大家都諗住睇吓建制派點樣再次甩轆，點知甩轆嘅反而係泛民，有人全程唔見人，亦有人顧住做其他嘢趕唔切投票，甚至有人擺烏龍，差啲投錯票。泛民口口聲聲話要開戰，結果虎頭蛇尾，落敗與人無尤。
內委會會議上，原任內委會主席嘅梁君彥被提名角逐連任，泛民就派出民主黨（白鴿黨）議員單仲偕挑戰。過往多次批評白鴿黨及泛民嘅獨立議員黃毓民全程無參與投票，加上自從公民黨湯家驊辭任立法會議員後，泛民已經剩低二十五人，點知到投票嘅時候，泛民更只係剩低二十二人在席。
李卓人張超雄全程隱形
究竟係邊位泛民議員唔在場？咪就係全程都未曾出現過嘅工黨議員李卓人及張超雄，而另一人就係公民黨法律界議員郭榮鏗。雖然郭榮鏗喺立法會大樓內，但就因為喺辦公室開會，未能趕返會議室投票。最後梁君彥以三十七票擊敗得二十三票嘅單仲偕，成功連任。
到選內委會副主席時，泛民又輪到社民連梁國雄無投票，最後即使自由黨有在席四位議員倒戈，退而求其次競逐副主席嘅單仲偕都只得二十七票，輸畀體育、演藝、文化及出版界議員馬逢國。
至於財委會正、副主席選舉方面，泛民派出白鴿黨劉慧卿迎戰建制派推舉嘅保險界議員陳健波，但泛民只有十九名議員在席，而卿姐亦只得十八票，輸畀陳健波。而財委會副主席，泛民依然只得十九人，結果卿姐再以二十二票對三十三票輸畀對手陳鑑林。而財委會正、副主席選舉投票中，都各有一張白票。
內會財會「盡歸」建制派
建制派包攬內委會及財委會正、副主席職位，但都只係第一波行動，事關建制派已揚言財委會轄下嘅工務及人事編制兩個小組委員會正、副主席都係志在必得。下周立法會就會就兩個小組委員會及各事務委員會選舉正、副主席，泛民如今為利益已變成一盆散沙，相信建制派只要齊人，不費吹灰之力就可以成功搶位。