中環出更：外交部駐港公署有活動曾蔭權忽現身

被控兩項公職人員行為失當罪嘅前特首曾蔭權爵士下月再出庭應訊，尋日朝早佢慣常同太太曾鮑笑薇去教堂祈禱。不過，曾蔭權並非去平日去開嘅堅道天主教聖母無原罪主教堂，反而去咗跑馬地嘅聖瑪加利大堂。無獨有偶，同曾蔭權關係密切嘅前政務司司長許仕仁被定罪前都係去呢間教堂，又會咁啱嘅？

曾蔭權與曾鮑笑薇昨早約七時就去到聖瑪加利大堂，相比起前兩日生日時笑容滿面嘅樣子，曾蔭權尋日喺教堂時就明顯木獨得多。雖然他同太太離開教堂時都面露笑容，但就略帶牽強。

雖然官司纏身，但曾蔭權都照樣厚顏出席活動，尋晚六時許，佢獨自離開寓所，前往外交部駐港特派員公署出席一個粵港交流活動，財經事務及庫務局局長陳家強、全國政協常委陳永棋等都有出席。

話時話，曾蔭權已經「落鑊」，按照常理都唔會有組織或人士請佢出席活動有礙觀瞻，但可能有關方面發出邀請時，都未知道曾蔭權「落鑊」都未定。

卓妮