中環出更：家具展夠懷舊唐慕貞憶童年事
耐用嘅家具除咗載滿成長回憶之外，仲往往見證住時代變遷。日前香港傢俬裝飾廠商總會舉辦「家具．港故事」展覽，透過新舊家居布置回顧數十年間家具演變過程。總會主席嚴志明、常務副主席兼茲曼尼創辦人唐慕貞（Jane）及著名設計師利志榮講起舊式家具，各有情懷，有人不期然諗起童年往事，有人就好懷念已消失嘅人手製作家具工藝。
Jane話，佢嘅童年時代並非每家人都有梳化，好多時係用緊木造嘅座椅，佢屋企都唔例外。後來屋企買咗張三座位梳化後，屋企人多唔夠坐，結果一個位要留畀長輩坐，而佢哋四兄弟姊妹食完飯後就會爭住坐剩餘兩個位睇電視，爭唔切就惟有坐梳化邊嘅扶手，諗起往事就甜在心頭。
利志榮感慨人手工藝失傳
利志榮就話，過往好多手造嘅家具，依家都變成機器大量生產，佢認為消失嘅唔係家具，而係人手製作家具嘅手藝，十分可惜。至於用料方面亦與過往有所不同，實木家具買少見少，由價格相宜嘅蔗渣板取而代之。同場另一位設計師劉小康與卡撒天嬌副主席鄭斯燦就對懷舊木櫈仔情有獨鍾，劉小康最近就設計咗貌似木馬嘅座椅，鄭斯燦就話難忘細個時匿埋喺木櫈下玩捉迷藏。
當日展覽，嚴志明對懷舊辦公室布置好感興趣，佢話以前打字機好貴，通常辦公枱下面會有一格櫃桶專裝打字機，要用時先趟出嚟打字，唔用就趟番入去，仲要鎖埋佢添！
卓妮